السلام عليكم ورحمة الله وبركاته
وشلونكم ياربعي
تصدقون عاد اني ولهن عليكم وله الشايب للجريش
ووله البسه لقوطي التونه
غبت عنكم وفؤادي هنا بينكم متعنقط بأخمص حروفكم والحقيقه اتسذب ماجبت لكم خبر بس عاد اني ذبحن الشوق لخششكم ياشينكم بس
ماحب ابين مشاعري لازم اصير الرجل الغامض
المهم ودي نرجع الى عشر طعش سنه ورا تقريبا عام 1411هـ ايام حرب الخليج
تخبرون يوم ارجاء الرياض تتمرجح على سمفونية الاسكود بتاع صدومي الله يرحمه كان راقل حنين
وتخبرون كرشة سليمان العيسى يوم يطلع ويقول خطر على جميع مناطق المملكه ؟؟ذيك اللحظه مابقى ادمي سعودي مالقطه اسهال عنيف حسبي الله على جبهتك يالعيسى
اخبر اني منبطح بالصاله عملا بمقولة الموت مع الجماعه رحمه
ولا جا طاري جرس الانذار لازم ياطونن وهم هاجين لغرفة السلامه ام شطرطونات وماهنا بزر ما رنع راسي
المهم اقوم انا ولحافي واركض معهم وانبطح حدر الدريشة عملا بمقولة لا تموت تحت المكيف ,
واخبر امي تبخ بخشمي عطر ليمون تحسبن مغمى علي وانا خاشت
ويجيك ذاك الصاروخ اللي ولعت الدرايش منه اول مره اشوف دريشه بردقانيه وكنا حاطين على المكيف كيس زباله اسود اخبر انتفخ صار تقل ثوب نفاش حق عبده بيوم العيد
المهم
عقب نفيخة المكيف ماش تقل اوجعتنا بطوننا
وكان فيه بالعائله كمن جذع متهور يرقون بكاميرا الفيديو يصورون السوني اللي بالسماء وهي مطاردة الباتريوت لاسكود
كانت ايام تنعم بالكشتات والزيارات المباغته
يعني تطب على اقرباك باي وقت بس لبق وادخل ويمكن يصادفك الحظ ويعلن وقوع الخطر وانت فوق كبري
عاد بهاللحظه تكتب وصيتك على السواقية وترسم دموع وفناخر يناشقن وتناظر السماء بعيون المودع وتراقب الصار وخ وهو ناحرك يبي يخمك .....
ذيك الايام كنت بالثانوي انا واخبر ماهنا بنت ما افتشت لي يقولن حرب والفتش ضروره خخخخ
كنت ادعي تبتل الحرب عشان اشوف خشش البنات
بس يوم شفت شظيه من صاروخ بحوشنا قلت ياروح مابعدك روح وقررت العائله الكريمه ان تهج الى القصيم
القهر يوم رحنا للقصيم واثرهم يتعازمون وفالينه وهات يامفاطيح وبلع وحنا جايين وجيهنا متشطبه من الروعه
واخبر وحده من خواتي بوقت سقوط الصاروخ شهقت وعضت براطمه
تصدقون الى الحين نحاول نفك البراطم بابو جلمبو وعجزنا ..
وبالقصيم يقولون هذي الساعه المباركه اللي شفناكم خخخخ ا,,ي مباركه انت وياه وحنا هاجين من الطراطيع اللي بسطحنا
طبعا طراطيع صدومي الله يرحمه
عاد انا جايكم ابسولف واحذركم ومير تذكرت الحرب
ومن هذا المنطلق وبعد هذا التمهيد الطويل
حبيت اقولكم اني في شبكة الشماسية اطلقت جرس الانذار لوجود مريض نفسي يحاول تخريب الشبكه
على الجميع اغلاق البيبان والدرايش ووضع شطرطون على جميع المنافذ
ومن هنا اقول للي يدخل بالف معرف ويحاول يخرب ويبربر ويجي يكب علينا امراضه النفسيه
تراك ماتعرف تتنكر ياخي غير طريقتك بالكتابه يا دبشه
نفس الاخطاء الاملائيه ونفس الاسلوب الغبي
ودي اسأله كم مقاس جبهتك ؟
وهل هناك عقل بين حنايا رأسك ؟
بعد قرع جرس الانذار للاعضاء
اتمنى من ادارة الشبكه فضحه على رأس (ولا يستاهل يصير على رأس ) بل على رجلين الخلائق
لاحد يشره تراي مكثر فلم كرتون اليوم
كان بصحبتكم الليث الابيض
قصدي الليث البني عشان ما اصير نصاب