افزعوا لي برايكم

#1 10-25-2010, 12:56 PM

( بسم الله الرحمن الرحيم )

اخواني واخواتي المشاهدين
السلام عليكم ورحمة الله وبركاته وبعد : -
اسعد الله اوقاتكم بكل خير
الكلام هذا متعوده من اللي يقدم بالتلفزيون
المهم انا بلان الله بواحد اسمه السامر من طلعت على الدنيا وهو رفيقي ومن شين الحظ او زينه اننا تخرجنا جميع وتعينا بديرة وحده اول ما بدينا بالتدريس همن نقلنا وبتل معي او انا بتلت معه ومن ذاك الوقت الى هالحين وهو يبلشن باشواره وما عمره عطان شور وطلع زين بتله يوهقن وانا اذا عطيته شور يطلع زين ويستفيد
وهالحين شوره يختلف عن منول له سنة وهو يقول لازم تعرس وانا ما شكيت عليه بس لقافه منه او يبي يورطن مع مرتي واذا تعذرت قلت له ما عندي دراهم يقول اعطيك المهر ( طبعا اعرفه يسلفن وينشب بحلقي لين اوفيه )
مرة كزن لناس اخطب منهم ويوم شفته هجيت طلعت اشين من اللي عندي
وهالحين يقول خذ اخت السوري ابو وسام جارنا يوم كنا بالحفر اللي جاب لنا شي يوكل اسمه " كبه " يوم حنا ما نعرف الا المرقوق والمطازير والرز ويوم تغربنا بحفر الباطن تمدنا وصرنا نعرف الشكشوكه وبدا السامر يتميلح علي انه يعرف يصلحه مع انها بس اقطع بصل كبار وقشور طماط
عاد يوم صرت معكم بالمنتدى صار لي اخويا ثانين غير السامر قلت اباخذ رايهم ما ورى ما توهقت من رفيق العمر
وهالحين ابيكم تساعدونن برايكم
وش رايكم اطيعه واخطب السورية اخت ابو وسام او اي وحده اجنبية
او آكل تبن واسكت على اللي عندي
او ادور اي وحده من جنسنا يعني سعودية

تراي حطيت الموضوع بهالقسم لاني ما ادري وين يحطن المواضيع اللي كذا

لا تبخلون علي برايكم

10-25-2010, 02:02 PM

هالحين شوره يختلف عن منول له سنة وهو يقول لازم تعرس وانا ما شكيت عليه بس لقافه منه او يبي يورطن مع مرتي

ياحبكم لخراب بيوت بعض
مادري وش أنتم شايفين بهالسوريات ترا كل هاللي يطلعن بالتلفزيون مارات على الورشه قبل لا تشوفون خششهن
كل الأجنبيات اللي درسن معنا نعمتن من الله يازين أشهبتنا عندهن

10-30-2010, 06:35 PM

الله لا يفضحنا هههههههههههه

ياخي وش بقى ما قلته

بس تراك نسيت تعلمهم مقاس فنيلتي ولون زبيرياتي

يا حبي يا عزوزي أنا راحمك ترا عيشتك ماهيب عيشة

صدز اني أنا ومرتي نترانع أحيانا بس لا رضت علينا تطير بي لين راسي يصقع الخزان

أما أنت كلش كلش مناقر ومرانع

وعلى فكرة أخت ابو وسام طارت لقطه حدا شيبان القصيعه

المهم الحق عمرك ترا يمدحون الفلبينيات هالوقت >> استقدام شغالة صار

وشوري هو الشور يالدرنقه ماعمرك خليت رايي الا تحوق وتمطرس لين ترجع لرايي كش عليك مير

ترا ماسنعك وخلاك آدمي غيري

تخبر يوم ننقل لداخل المدينة ونروح نشري كنادر وشراب خلاص صرنا أوادم وانت وخشتك جايب نعال شيبان من قبة رشيد
ورحت بك لــ أولدو وطقينا أحسن جزمات تصدق للحين عندي متحسف بهن اتذكرك بهن ياخي ماقدر احلتهن

وياما زغطتك شكشوكا ماكبر خشمك الا البيض

وآخرتها تحش بي هنا يابو فنيخة صدز خاتمة صلبي خخخخخخ

مير لا يفوتك القطار اعرس خذ وحده تشر لها بشماغك تجيك طايره على كفرين

ماورا ماتعذبت

عاد مهما حشيت تبقى حبيب ألبي مع انك طرمبه

سحر لا تلومينا لو شفتيه ماظنتي ترضين بوه وجهه يقطع الصامولي من البيت وانا اباخذ أجره

10-30-2010, 11:20 PM

سحر انتي وش تقولين
يعني اطيعه او اعيي
بعدين ورا فيداتنا ما يروحن للورشات مثل ذولي اللي تقولين او حاليهن الله بلا ورشات
عاد تراهن من تالي باديات ايتسنعن الى صار بووه اعروس ويبلشن ارجالهن من العصر وعند عن الكوفيرات وبالمشاغل والرجل ياحول بالجمس طاقته الشمس همن يروح يصلي المغرب ويجي ويسكت البزران اللي تلقينه شاري له كاكاو واللي يحط باثمه الرضاعة وفتح قزاز الجمس ويهف على روحه وهي اخذه منه المقسوم وداخله بالمشغل والا اطلعت اثره فايتته صلاة العشاء راح يوديه العرس اللي ممنوع اصطحاب الاطفال وخلت البزران معه وتلقينه قاعد وماد رجلينه والبزران واحد متوسد طرف رجله وواحد متوسد فخده والثاني بحجره باثمه الرضاعة همن تطلع وتبدا تسرد له وش شافت وهو محول من السهر والتعب واول ما توصل البيت تنحر المغسلة وتبدا تحك البوية اللي هي حاطه وترجع شيفه مثل منول يعني التزين للحريم اللي بالعرس وهو له التعب ودفع الفلوس
والله يانا قرقه

المهم وش رايكم اطيع السامر او اسكت على اللي عندي لا يجين اقرد منه

10-30-2010, 11:30 PM

السامر وش فضحتك بووه
ما قلت شي غلط تراك دايم تحط بي شي وانا ما قلته
انا ما قلت الا اللي انت تقولي
وشلون اخت ابو وسام اخذه شايب بالقصيعة وانت تقولي اخطبه اجل هالحين تلقاه تزين للشايب مراصيع وقرصان الله يعطيه المر
انت متأكد من الكلام اللي تقوله تراي تحطمت
ولا تورطن بالفلبينيه يجين عيال اخشومهم مثل خشمك المنفلط تلقا الواحد خشمه تقل جخر اقعوسه على طاري القعوسة تذكر يوم حنا نغرق عقارب بالحيالة ونجمعهن بقوطي
وترى ما اذبحن الا حبك لو ما احبك كان من زمان مخليك
اللي عندي تقل شامة خبر اشوفه كاثرة طلباته تبي تقضي اقروشي عن العرس وبادية بعد تهوشن عنك تقول لا تماشيه قلت مالي صديق غيره وهو ما يلقى احد ياخذ كلامه ونصايحه الا انا

المهم بووه موضوع جايزن لي ابروح ارد عليه واجي

10-31-2010, 10:26 AM

ههههههههههههههههههههههههههههه

ههههههههههههههههههههههههههههههه

اللحين من جدك هذا موضوع تبي الراي فيه

و لا بس منزله فله

قسم بالله و انا اقرا جاني مغض من كثر ما اضحك

>>>> انفضحت بالمكتب من الضحك

يقولون البنت انهبلت من الضحك

و الله انكم فله ...

اقوول استفتي قلبك و ان افتاك الناس

يعني كل عنزه معلقه من كرعوبها

>>> لا تسال وش يعني كرعوب

10-31-2010, 10:41 AM

ينقل للقسم الانسب ..

حبيبي ياعز الرفيق عنديلكـ عراقية .. بنت اصل واصول متربيه على يد صدام ..!
ويش تبي بالسوريه تبلشكـ كل يوم توديكـ .. للسوق ماتبي غير كريماتـ .
خذلكـ عراقيه وانا خوكـ وماراح تندم ..!

10-31-2010, 06:39 PM

شف ياعنز الرفيق
الحين متوهقه بك وحده تبي تخليهن ثنتين بعد

10-31-2010, 07:07 PM

حياك الله يا عز الرفيق
تبي شوري خلك على ام العيال وشلك ووجع الراس
لا يهمك السامر تراه يبي يوهقك با ها السورية وانت خبل كل يوم يوهك بشي ما تتوب طيب الحين هو وراه ما يعرس او تدقة المدام ( والعرس تراه مهوب شين )

10-31-2010, 11:07 PM

مساكم /صباحكم سعادة

وبعد السعادة يامن الوجع
مابقى الا تطق على السعودية سورية ياقليل الخاتمة<جعل اللي يعرس على سورية تسوي فيه اللي نسمع ويصير مثل الخاتم بيدها

المهم مالك بالطويلة

بقولك شوري
؛

زوجتك لاتخرج عن مسمى انثى
والانثى بطبعها تريد من يثني عليها
يبدي اهتمامه بها ليكون ذلك محفزا لها
1/انت الآن ابدا بخطوة ..~
مثلا قل لها:
اليوم انت غير
و انك تمنيت لو سهرت معها تلك الليلة حينما كانت بغاية اناقتها ومكياجها<اشك انها يوم جت من العرس اللي وصفته انك لاقيتها بالصراخ والتأفف من الاطفال وانك ذابحك النوم

وهذا اللي سبب لها احباط وخلاها تشيل كل مكياجها

2/ مالمانع لو زرت نعومي واخذت لها عطر ولانجري على ذوقك كهدية
3/جلسة مصارحة تبين فيهاا ماتريد منها فالعلاج يكون بالاخذ والعطاء ومثل ماانت ترى فيها عيوب اكيد هي تراك بالعين التي تراها بها
4/ لايكن للمادة عائق في حياتك ومعاملتك لها والفلوس التي ستتزوج بها اخرى اصنع منها زوجتك لحياة اخرى
اخي
الانثى لاحياة لها الا تحت جناح الرجل فكن لها ذلك الرجل الذ ي يعطيها الحنان والامان
وكن مرآتها التي تعكس لها الجمال الذي تريده انت

فكر قليلا
لما الجمال كما ذكرت فقط للنساء
لما تبالغ بالاناقة واظهار جمالها في مجتمع النساء
الاجابة سهلة
لان هناك من يرى هذا الجمال.<اتمنى تكون الفكرة وصلت

ولك بالغ احترامي وتقديري
وقول لخويك كان به خير يجرب هو
مع اني مااتمنى ابدا مثل هالزواجات تصير
ربما اكون مع صديقك فهو صديقك الصدوق الذي يؤلمه توجعك وتضايقك وهذا هو اجتهاده
وهنا ايضا العيب فيك لانك لجأت له وتركت مصارحة زوجتك وهي تؤام روحك وربما لو بنيت علاقتكما على الصراحة التي لاتصل الى حد الوقاحة او البجاحة
منذالبداية لكانت اجمل وارقى داخل اسوار اسرتكما لايطلع عليها اقرب المقربين

اخر شي بكون معاك
ربما تكون زوجتك ليست هي الملاك الذي ترسمه في خيالك لتحتويه حد الانتماء والولاء والاحتواء لكن اثق انك قادر على جعلها كذلك
فهي من سميت حواء لاحتوائها ادم

بالتوفيق ودعواتي لك بحياة سعيدة

افزعوا لي برايكم

ساحة الحوار والنقاش