وصلك الدور وإلاّ ما وصلك الدور .. يا بشار/سداح

لو أن الله في صدري خالق ٍ قلبي ثلاث أدوار
قدر يستوعب اللّي كل ليله تطرق أبوابه

وخصّص دور للي تآصله من نشرة الأخبار
ودور لحضرة ضيوفه .. ودور لحضرة أحبابه

ولا شفته يغيض ويمتلي همّه ودمّه حار
ونيرانه في شريانه من الأحداث شبّابه

وصلك الدور وإلاّ ما وصلك الدور .. يا بشار
علي صالح يباريك .. ومعمّر فاقد اعصابه

على ظلمك بعد قامت وثارت ثورة الثوار
زهقت .. ويزهق الباطل لا جاء للحق طلابه

يا طول رقبتك وراسك مدرمح والعيون صغار
تحسب إنك أسد غابه وجدّك نعجة الغابه !

في دم الشعب تسبح يا البطوش المجرم الجزار
لا شفت مظاهره شغلت طياره ودبابه

جبان ولا تنادي بالعروبه وانت صوتك عار
لو أنـّـك تليس الدين الحنيف تدنّس ثيابه

يسوقك آية الله يا ضعيف الدين سوق حمار
لا سلّط فوقك السيف المزيّف تلحس إنصابه

ذبحت المسلمين ولا قدرت تحارب الكفار
شعاراتك على المنبر تجي وتروح كذابه

تجمّع مجلس الأمن وترجاك وعطاك انذار
وهاذي عادة الظالم لا كابر يفتل أشنابه

تبي تسقط رغم انفك عسى مثواك وسط النار
وتقاضيك اليتامى والقضاء المحتوم ترضى به

ياحزب البعث يوم البعث وش عذرك من الجبار
ليا قامت جهنم تزهم الشيطان وأحزابه !!