العبا يه عولموها وانفثوا فيها السموم

#1 11-03-2011, 09:07 PM

العبا يه عولموها وانفثوا فيها السموم
من ملاهي الرقص جابوا فكر تخصير العباة
ضيقوا صدر العباة ووسعوا طرف الكموم
ونزلوها لين وصلت آخر أكتاف الفتاة
بانت نحور الصبايا وانكشف شكل الهدوم
والغبية تحسبنها زايده زين وحلاة
والبراقع دلعوها لين عام الخد عوم
لازم القرضه توسع والكحل يلقى الحياة
طوروا شكل النقاب وصارت الدعوه علوم
صار شفاف(ن)يوضح خدها ويا الشفاة
وآخر الصرعه لثام(ن)يفتن الرجل العزوم
والفتن قالوا ضلاله للقلوب المؤمنات
وش علامك بنت حواء تستبيحين السلوم
أو مع خيلك ياشقراء بعضكم جنس البنات
قاهرتهم هالعبايه مايبون الستر دوم
جدهم علمان يعني لاصيام ولاصلاة
حطوا إن البنت سلعه وغلفوها بالهموم
وارفعوا شعار(ن) ينادي للحقوق الضايعات
من ظلمها والبدو لاصاحت الحرمه تقوم
قايمه تحت المعادي لأجل عين الشامخات
من ظلمها يوم قام المعتصم من عز نوم
قال وين الكافر اللي يستبيح المسلمات
ثم ذبح لأجل شعرتها من العدو كثر النجوم
قال هذا حق منهو يستذل الطاهرات
نكسوا ذاك الشعار ولملموا باقي السهوم
يكسر الخاطر سهمكم لاضرب في مدرعات
بيتكم لاصار مبني داخل البيت مهدوم
وبيتنا صوم وصلاة وحج وأشهد والزكاة
إتركيهم يابدويه وخلي اللايم يلوم
وسعي خصر العبايه واكرمي بالمكرمات
وإن رفعتيها لراسك أصبح الراس محشوم
العبايه فوق راسك حشمه وطيب وثبات
وماعليك من اللئيمه تحاول تقلدك يوم
لبست البرقع ولكن حن عرق الماجدات
بحنكها ألفين دقه مدري ألف من الوشوم
أو تراه ألفين هكري يكتبون الذكريات
ولابغت تكتب قصيده قافها هو قاف يوم
(يوم يابا)(يوم يابا)جاك عرق الراقصات
جت تقول إني بدويه قلت أنتي وجه بوم
إعقبي منتي بدويه أنتي جزء من الحصاة
يابدويه لايغرك بعض غربان(ن) تحوم
أنتي فوق الكل أنتي فوق روس النايفات
أنتي يوم الحرب دارت والمعارك (قوم)(قوم)
عانقت عزوات أخوك صوت ضرب المرهفات
إن حدوا من بيننا أو طولوا حد العقوم
يابدويه طبعي أرقى فوق كل الطايلات
إحذري يابنت منهم طبعهم نفث السموم
عولمتهم لو أعرفها طلع معنى الشتات
ضيقوا صدر العباة ووسعوا طرف الكموم
وبيجي يوم(ن) نشوف شقوق في وسط العباة

.
.
شعر : ناصر البرّاق